O Porto de Vigo e o Concello buscarán acordos sobre a planificación portuaria, o crecemento da terminal e a interacción coa cidade a través de comisións bilaterais de traballo, aínda que o alcalde, Abel Caballero, reiterou que o seu rexeitamento a novos recheos na ría é “inamovible”.

Así o manifestou o rexedor tras manter a súa primeira reunión co novo presidente da Autoridade Portuaria, o exconselleiro de Sanidade, Jesús Vázquez Almuíña.

Abel Caballero sinalou que “o primeiro” que trasladou ao responsable portuario foi o seu rexeitamento a calquera novo recheo na baía, unha posición “categoricamente inamovible”, e indicou que o Concello aceptaría transformar un dique en peirao de atracada, aínda que non actuacións para gañar novos espazos ao mar.

Por outra banda, o rexedor lamentou que o novo Plan de Usos e Espazos Portuarios (PUEP), que “hai que refacer”, “vai na dirección contraria” ao reclamado polo Concello e, en lugar de ceder máis espazos para a cidade, pretende recuperar varias zonas para uso portuario.

O alcalde tamén insistiu na necesidade de que se constrúa un túnel na Avenida de Beiramar e se recupere a superficie para a cidade, ou na súa “oposición frontal” a unha conexión ferroviaria desde a terminal de Bouzas “que rompa a cidade” e que, ademais, “Citroën non quere”.

USO MÁIS EFICIENTE DO ESPAZO

“Eu ofrezo a miña cooperación para buscar un uso máis eficiente dos espazos portuarios, ou para falar con Adif e Zona Franca (…) pero a oposición aos recheos é inamovible” e “nin sequera se vai discutir”, repetiu.

“O Porto é un factor económico importantísimo (…) ten a miña cooperación, porque o entendo moi ben, coñézoo, fun presidente do Porto, fun ministro de Transportes, fun ministro da Mariña Mercante, eu mesmo son mariño mercante e é a miña primeira carreira, creo entender a forma na que o Porto de Vigo debe ir”, engadiu o rexedor.

AVANCE “CON ACORDOS”

Pola súa banda, o presidente do Porto, Jesús Vázquez Almuíña, avogou por traballar para lograr acordos entre ambas as institucións, co fin de que as actuacións se fundamenten nun “equilibrio” das demandas de ambas as partes.

No entanto, recalcou que a “premisa” da Autoridade Portuaria é que a terminal “siga crecendo e consolidándose”; para iso, recalcou, o Porto necesita máis atracadas, e máis espazo para aumentar a súa actividade.

“Canto maior apoio teñan os proxectos, mellor. O meu equipo vai tratar de chegar a acordos, porque iso axilizará todo”, sinalou, en alusión ás comisións bilaterais de traballo, á vez que aseverou que o Porto de Vigo ten unha serie de “retos” de futuro e necesita “a complicidade da cidade”.

Por último, avanzou que a Autoridade Portuaria e o Concello traballarán de forma conxunta para promocionar Vigo como destino de cruceiros, co fin de tentar recuperar ese tráfico, se é posible a partir de maio ou xuño xa que, coa pandemia de COVID, leva meses paralizado.

VULCANO

Por outra banda, e cuestionado polos xornalistas acerca da situación dos terreos do antigo estaleiro Vulcano, recentemente adquiridos por Marina Meridional para reactivar a construción naval, Jesús Vázquez Almuíña reiterou que o Porto apoia a este sector, pero que é necesaria unha “seguridade xurídica” para que os proxectos sexan “viables”.

Nese sentido, lembrou que o Porto solicitou a suspensión da venda a Marina Meridional ata que o Tribunal de Conflitos Xurisdicionais se pronuncie sobre a concesión de dominio público portuario nesas instalacións, e determine se dita concesión quedou extinguida (e debe volver ao Porto) coa liquidación de Vulcano ou se permanece en vigor (nese caso caduca en 2027).