O Goberno galego aprobou este martes a licitación, por un importe de 7,3 millóns de euros, das obras de ampliación do Instituto Feiral de Vigo (Ifevi) en 5.000 metros cadrados. Un diñeiro que chega logo de numerosas peticións do Concello de Vigo que acusou ao presidente galego de “ter abandonada” á cidade.

O presidente da Xunta, Alberto Núñez Feijóo, culpou da situación ao Goberno central. Na última reunión do Consello do ano, dixo que a contratación se inicia despois de que tardasen “nove meses” os informes sectoriais por parte do Estado. Unha vez estes estiveron listos, o Concello de Vigo notificou “o 18 de decembro” a dispoñibilidade dos terreos.

Así, este martes o Executivo autonómico licitou esta “nova ampliación” por 5.000 metros cadrados. Suporá un desembolso de 7,3 millóns de euros que alcanzará os 7,6 millóns xunto os servizos complementarios.

Feijóo reivindicou que esta ampliación se suma á xa efectuada en 2018, cun investimento de 4 millóns de euros: “En definitiva, desde que chegamos ao Goberno, levamos investidos no Ifevi case 16 millóns de euros en sucesivas ampliacións”.