A Xunta publica este xoves na Plataforma de Contratos Públicos de Galicia a licitación do contrato de explotación da estación de autobuses da Avenida de Madrid, en Vigo, por un valor estimado de 775.000 euros.

A entidade concesionaria asumirá a xestión da terminal por un período inicial dun ano, cun valor inicial de máis de 387.000 euros, e a posibilidade de prórroga por outro ano máis, ata alcanzar os 775.000 euros. As empresas interesadas teñen de prazo ata o 25 de novembro para presentar as súas ofertas.

O contrato que se licita inclúe a xestión do servizo público da estación de buses, a explotación dos locais e servizos complementarios, das zonas comúns e a explotación publicitaria. O actual servizo de explotación finaliza en xaneiro de 2021

O anuncio publicado este xoves recolle o orzamento base da concesión por 49.300 euros, en concepto de compensación por obrigacións de servizo público.