A Federación de Industria do sindicato CIG dirixiuse ás distintas parte que integran a mesa do convenio do Metal da provincia de Pontevedra para pedir retomar as reunións e instar a recuperar a negociación deste convenio, paralizada desde marzo pasado como consecuencia da pandemia de coronavirus.
A confederación nacionalista apuntou que, tras a continuación da actividade laboral, faise “imprescindible” sentar novamente para chegar a un acordo sobre as condicións laborais do sector, cuxo actual convenio perdeu vixencia en 2019.
Por iso emprazaron á patronal e ao resto de sindicatos a establecer un calendario de encontros para retomar as negociacións e pactar un convenio que, ao seu xuízo, debe servir para recuperar o poder adquisitivo dos últimos convenios. A ese respecto, apuntaron que os traballadores do Metal da provincia de Pontevedra “cobran 1.150 euros anuais menos que os da Coruña”.
Así, a CIG propuxo subidas lineais para todos os traballadores de 600 euros “como mínimo” e recuperar a cláusula de revisión salarial efectiva “para cobrar os atrasos das diferenzas entre o IPC”.
OUTRAS PROPOSTAS
Tamén sinalou como “importante” a regulación da subrogación entre empresas para que, ao acabar as concesións, os traballadores poidan ser contratados polas empresas que entren nas mesmas condicións; e apostou por clarificar as condicións nas que os empregados terán dereito a cobrar pluses de toxicidade, penosidade ou perigo, así como as dietas.
A CIG reclama, por outra banda, a redución da xornada anual a 1.752 horas, mellorar os complementos salariais nas baixas por enfermidade común, e mellorar as licenzas e permisos.
