A compañía automobilística Citroën celebra este ano o 50 aniversario do seu modelo GS, o cal foi presentado no Salón Internacional do Automóbil de París de 1970 e alzouse co galardón de Coche do Ano en Europa en 1971. A firma produciu máis de 150.000 unidades deste vehículo na súa planta de Vigo.

Segundo recolle a marca nun comunicado, na década dos 60 Citroën lanzou dúas vías de estudo para conquistar un segmento que empezaba a crecer e no que estaba ausente, as berlinas de tamaño medio. Se o proxecto F nunca chegou a ver a luz, o proxecto G acabaría cristalizando no GS.

“Deseñado por Robert Opron, ‘pai’ doutros modelos como o SM ou o CX, o GS reforzou a imaxe de Citroën entre o gran público cunha liña e un interior orixinais asociados con solucións técnicas avanzadas, pensadas para optimizar o confort.

O seu deseño non tiña equivalente no mercado e chegaba con innovacións pouco frecuentes, como catro freos de disco, chasis de aliaxe lixeira ou a suspensión hidroneumática, que axudou a popularizalo en España”, subliñou a firma do Grupo PSA.

O seu motor de catro cilindros desenvolvía ata 60 cabalos de potencia e alcanzaba unha velocidade máxima de 150 quilómetros por hora. Entre outros galardóns, ademais de ser o Coche do Ano en Europa en 1971, foi o vehículo máis vendido en Francia entre 1975 e 1978.

Ata 1986, Citroën fabricou máis de 2,4 millóns de unidades do GS e do GSA, das cales 153.983 unidades foron ensambladas nas súas instalacións de Vigo, xa que entre 1984 e 1986 producíase en exclusiva na cidade olívica.