Abanca formalizará este luns, na reunión da Xunta Xeral de Socios de Nueva Pescanova, a toma de control da pesqueira, tras facerse co 80,46 % das accións, en virtude dun acordo con Banco Sabadell e Caixabank.

A entidade financeira galega incrementou, nos últimos anos, a súa participación en Nueva Pescanova de forma progresiva, e pasou de ter o 5,465 % das accións ao 40,66 % que tiña antes do acordo con Caixabank e Sabadell.

Tras facerse público ese acordo, que lle outorga o 80,46 % da propiedade, Abanca adiantou que a súa intención é reforzar a estrutura financeira da compañía e mellorar prácticas de goberno corporativo así como de xestión, para “fortalecer o seu posicionamento competitivo e potenciar o seu crecemento”.

Ademais, incidiu en que reterá “unha participación importante” no accionariado para “avanzar na procura dun socio industrial, que permita construír un proxecto de valor a longo prazo desde Galicia”. Entre os obxectivos marcados pola entidade financeira está o de “devolver os órganos de decisión da compañía a Galicia” e reforzar o seu apoio ao complexo mar-industria da comunidade galega.

RENOVACIÓN DO CONSELLO

Segundo figura na orde do día, na Xunta de Socios do luns, que se celebrará ás 12,00 horas nas instalacións de Chapela-Redondela (Pontevedra), fixarase o número de membros do Consello de Administración (actualmente son 12, pero é previsible que se reduzan), e renovarase este órgano “por caducidade”.

Iniciarase, dese modo, unha nova etapa na multinacional pesqueira galega, que pasou por diversas vicisitudes desde que, en 2013, iniciou unha particular ‘travesía polo deserto’ tras solicitar o preconcurso de acredores e desvelarse a súa elevada débeda.

En 2015, e coa anterior cúpula procesada por falsear as contas e levar á empresa á quebra, o grupo iniciou un novo camiño, con outro nome (Nova Pescanova) e outros donos (un grupo de entidades financeiras), cun equipo presidido por Jacobo González-Robatto e dirixido por un novo CEO, Ignacio González Hernández.

Abanca tomará o temón de Nova Pescanova tras un ano, o 2019, no que houbo un incremento de vendas que, no entanto, non estivo acompañado polos resultados. O grupo pesqueiro aínda non presentou as contas de 2019, aínda que as súas cifras quedaron reflectidas no informe anual da propia Abanca, que apuntaba unhas perdas de polo menos 32,2 millóns de euros.