Traballadores e traballadoras da empresa de telemárketing, Unísono, están reunidos desde primeira hora da mañá para denunciar que non se aplican medidas de seguridade contra o coronavirus nos seus centros de traballo. Por exemplo, non se respecta a separación dun metro e medio de entre traballadores.

A empresa e representantes do persoal reuníronse esta mañá durante hora e media. Desde a sección de UGT en Unísono, Antón Otero informa que se “están poñendo solucións hidroalcóholicas ou panos de papel que non son abondo para todos”. Tamén por seguridade e para evitar contaxios, os portavoces sindicais pediron cascos individuais, mais aínda non foron repartidos. Sinalan que a empresa intentará traer máscaras.

O persoal presentou unha petición vía e-mail á Inspección de Traballo. A resposta foi que nestes momentos existen tres inspectores de garda para realizar tres mil inspeccións. Non obstante, dada a relevancia desta queixa, Inspección podería presentarse ao longo da mañá.

Reclamaron ademais que a empresa se cinga ao convenio de telemárketing debido ás alegacións de Unísono para manter a actividade. Entre os motivos para ter aberto os lugares de traballo, a operadora indica que están dentro do convenio de banca. “Iso porque traballamos entre outros para ING” sinala Antón Otero.

A empresa engade que se non existe unha orde do Goberno para pechar as teleoperadoras, non pecharán. “O Goberno di que as oficinas bancarias poden permanecer abertas, mais non di que deban abrir as de telemárketing”.

Unísono ten en Vigo tres centros de traballo que suman uns 1.000 traballadores. Algúns membros do persoal pediron permisos xustificados non pagados para as persoas que teñen que quedar cos fillos na casa. “De momento é a solución que nos poden dar, aínda que reclamaremos outras medidas para recibir os salarios completos” aclara Otero.

Outra das empresas de telemárketing que está en actividade é Bosch, tamén con sede en Vigo. Esta empresa conta con 1.400 persoas e un só centro de traballo tamén en Vigo, “O risco está en que moitas persoas traballan en locais de espazo reducido e por tanto masificados” din desde UGT.

A empresa Unísono só atende desde a súa sede en Madrid. Postos en contacto con ela, non se recibiu ningunha resposta pola súa parte.