O armador Ritz Carlton chegou a un acordo cos propietarios do 75 por cento de Hijos de J. Barreras para facerse co control do estaleiro vigués, e trasladou a súa disposición a achegar entre 50 e 60 millóns de euros para cubrir o sobrecusto do cruceiro de luxo que se constrúe na bancada de Beiramar.

Segundo fontes coñecedores do proceso, o accionista maioritario (PMI, filial da petroleira mexicana Pemex, co 51 por cento do capital) e o grupo Albacora (propietaria o 24,5 por cento dos títulos) aceptaron ceder os seus dereitos políticos a Ritz Carlton nunha operación na que non se descarta a participación das empresas auxiliares acredoras, agrupadas na sociedade Uninaval.

Así mesmo, o CESCE (aseguradora participada polo Estado) estaría disposto a ampliar as súas garantías sobre o barco de Ritz Carlton. Desta maneira, segundo as fontes consultadas, salvaríase un atranco importante, xa que se corrixiría o desequilibrio patrimonial e evitaríase entrar en causa de disolución.

“O estaleiro pasaría de números vermellos a número negros, e sería viable”, sinalaron, á vez que recoñeceron, no entanto, que este acordo non despexa as dúbidas sobre a xestión futura de Barreras ou sobre o resto de encargos.

En calquera caso, apuntaron que a intención dos promotores da operación é trasladar este “paso adiante” ao resto de axentes implicados (Xunta, entidades financeiras, Pymar,…) para “que se somen” ao “desbloqueo” do estaleiro que, nestes momentos, ten unha carteira de contratos por valor de máis de 800 millóns de euros e un persoal duns 200 operarios, máis os centenares de empregados de auxiliares que traballaban nos proxectos.

GONZALO CABALLERO

O secretario xeral do PSdeG, Gonzalo Caballero, pola súa banda, expresou este venres a súa “satisfacción” polo preacordo alcanzado, do que non ofrece detalles (salvo que haberá unha “recapitalización” de Barreras) pero que, segundo celebrou, afasta o risco inmediato da liquidación.

O líder dos socialistas galegos puxo en valor a “responsabilidade” do Goberno de España e a súa implicación para liquidar esta crise, ante a “ausencia de compromiso industrial” do goberno autonómico de Alberto Núñez Feijóo.

Caballero advertiu de que hai que seguir traballando con “corresponsabilidade” para evitar “retrocesos” na solución, e pediu á Xunta “que se implique” para dar futuro ao sector naval, máis aló das “promesas incumpridas” e dos “acordos opacos” con Pemex que, ao seu xuízo, levaron ao estaleiro vigués ao actual escenario.