A asemblea de delegados do metal de CCOO en Vigo esixe a dimisión do presidente da Autoridade Portuaria, Enrique López Veiga, pola súa actuación “desleal, opaca, malintencionada e ruin” respecto ao futuro das instalacións de Vulcano.
CCOO acusa a López Veiga de tentar “impedir por todos os medios” que as instalacións que ocupa Vulcano, inmerso nun proceso de liquidación, manteñan unha actividade industrial e pasen a ter un uso portuario.
Afea o seu incumprimento dos “compromisos adquiridos” cos traballadores do estaleiro “e mesmo co presidente da Xunta”, e que aposte pola “desindustrialización” da comarca de Vigo ao “impedir” a continuidade da concesión das instalacións de Vulcano máis aló de 2027.
Precisamente a ampliación da concesión é a condición que a empresa Vicalsa, especializada en reparación naval, puxo sobre a mesa para facer unha proposta formal para dar continuidade á actividade industrial nestas instalacións.
Sobre a crise en Barreras, CCOO ratifica o seu apoio á manifestación do próximo martes, cando os traballadores do estaleiro farán un paro de catro horas.
Considera este sindicato que urxe unha solución para evitar o “impacto mortal” sobre as empresas auxiliares que están a provocar as débedas contraídas con Barreras, e que agora “non é momento de buscar culpables”, senón de centrarse na procura de solucións.
