Adif aprobou a adxudicación do contrato de mantemento das instalacións de protección civil e seguridade nos túneles dos tramos A Coruña-Vigo (Eixo Atlántico) e Ourense-Santiago.

O contrato adxudicouse á UTE formada por SICE e SICE Seguridade por 2,67 millóns de euros (Iva incluído) e conta cun prazo de execución de 24 meses. O tramo A Coruña-Vigo conta con 37 túneles, que suman 59,2 quilómetros, un 38% do percorrido total. No eixo Ourense-Santiago hai 30 túneles, cunha lonxitude total de 28,5 quilómetros, o 34,8% da liña.

O contrato diríxese ao mantemento das instalacións de protección civil e seguridade nos túneles, así como o establecemento das condicións técnicas e funcionais para a realización dos traballos relativos ao mantemento dos elementos que compoñen as instalacións, as condicións técnicas e os procedementos para o establecemento do plan de mantemento.

En concreto, actuarase na sinalización e balizamento de emerxencia, en corredores e pasamanos, na iluminación de emerxencia, nos sistemas de ventilación en túneles, en edificios e casetas técnicas e en sistemas de videovigilancia ou control de accesos, entre outros.