O conselleiro de Emprego, Comercio e Emigración, José González, mantivo este mércores unha reunión co empresariado de Mos para incentivar o uso das axudas á contratación, especialmente destinadas a colectivos prioritarios como a mocidade. No encontro, no que tamén participou a alcaldesa Clara Arévalo, o titular de Emprego destacou o novo enfoque da orde ‘Galicia Suma Talento: Emprégate’, dotada con 19,7 millóns de euros. Como principal novidade, este programa prioriza por primeira vez a aquelas persoas que recibiran formación previa financiada pola Xunta.
Neste contexto, o conselleiro lembrou que o Consello da Xunta deste luns deu luz verde ao programa ‘Talento Mozo’, cun investimento de 6,6 millóns de euros para redeseñar a formación xuvenil con novos compromisos de inserción. Estas medidas forman parte dunha renovación integral das políticas activas de emprego que busca un modelo “máis áxil e conectado co mercado”, incluíndo outras liñas como as axudas AFD (40 millóns) ou o apoio ás persoas autónomas, que contan con partidas que superan os 40 millóns de euros para o inicio e mantemento da súa actividade.
CAPTACIÓN DE TALENTO E CRÍTICAS AO GOBERNO CENTRAL
Durante a súa intervención, José González tamén abordou a política de captación de talento no exterior. O conselleiro criticou a regulación extraordinaria de inmigrantes anunciada polo Goberno central, tachándoa de falta de “planificación e rigor”. Fronte a isto, defendeu o modelo galego de “inmigración ordenada”, que prioriza o retorno dos galegos no exterior e a atracción de talento estranxeiro aliñada coas necesidades reais das empresas.
Para facer efectiva esta folla de ruta, o responsable de Emprego considerou “clave” que se axilice o traspaso a Galicia das competencias sobre as autorizacións iniciais de traballo. No ámbito do comercio, lembrou que está aberta a convocatoria de 2,5 millóns de euros para dinamizar os centros comerciais abertos, unha ferramenta que considera fundamental para fortalecer o tecido produtivo local e a competitividade do municipio.
