A factoría viguesa do grupo automobilístico Stellantis volverá suspender dúas quendas de produción esta semana por falta de pezas necesarias para a construción dos seus vehículos. En concreto, segundo informou a dirección da planta aos seus empregados, suspenderase a actividade do Sistema 1, que ensambla o Peugeot 2008, na quenda de noite de mañá venres e na mañá do sábado. Todo iso por “razóns de forza maior por mor de problemas de subministración”, segundo apunta a firma, que xa a semana pasada detivo parte da súa produción, do mesmo xeito que en innumerables ocasións nos últimos anos polas mesmas causas.