O comité de empresa da planta de Akwel Vigo, provedor da industria de automoción, anunciou este venres a convocatoria de folga indefinida a partir do 10 de xullo, despois dunha ducia de despedimentos no último ano e ante a incerteza que afecta á empresa tras perder o contrato con Stellantis. O órgano de representación dos traballadores trasladou á dirección da empresa a convocatoria desta folga e denunciou a “alarmante falta de carga de traballo” para despois do período estival na fábrica, instalada no Polígono do Caramuxo.

Segundo sinalaron do comité, a situación agravouse tras coñecerse que o grupo Akwel decidiu “abandonar”, por motivos económicos, o proxecto SCR (sistemas de redución catalítica selectiva) destinado a Stellantis. “Esta cancelación implica unha importante perda de actividade e facturación, afectando directamente as tres plantas do grupo, incluída a de Vigo”, alertaron. Este venres celebrouse unha reunión coa dirección da empresa, na que participaron o coordinador de CC.OO. para Stellantis en España, Santiago García, e o secretario xeral de CC.OO. Industria, Celso Carneiro.

Nela, lamentaron, a empresa limitouse a dicir que “hai que esperar” a ver se ao grupo “lle toca algo”, recoñecendo que non está a ofertar novos proxectos para Vigo. “Ante esta falta de compromiso e dun plan claro para o futuro”, o comité denunciou que “o risco de peche é real e cada vez máis próximo”, á vez que criticou que se actúe con “opacidade” ante os traballadores. Por iso, optaron por unha convocatoria de folga indefinida a partir do 10 de xullo, como medida de protesta “e en defensa do emprego e o futuro da planta de Vigo”.