O alcalde de Vigo, Abel Caballero, censurou a “caradura política” do PP por pedir explicacións ao goberno local sobre a subida do recibo do lixo, e lembrou que esa subida se debe á “estafa” de Sogama, que incrementou de 61 a 118 euros o canon que lle cobra ao Concello por cada tonelada de lixo recollido.
En declaracións remitidas aos medios, o rexedor olívico sinalou que o Concello se ve obrigado a repercutir esa subida, de “case o dobre” e, con todo, non repercute todo o incremento. Por iso, criticou que o PP “proteste” cando a subida do prezo do recibo “débese á subida do prezo que cobra Sogama”. “Rueda encargoulle ao PP de Vigo que protestase pola subida da taxa de lixo, débese crer que en Vigo somos parvos”, sinalou.
“Que caradura política teñen, de pedir explicacións ao Concello; pero isto é o PP de Vigo, cooperando coa estafa de Rueda contra a cidade”, denunciou Abel Caballero, que afirmou que os ‘populares’ deberían “pedir perdón”. Pola súa banda, o portavoz do grupo municipal do PP, Miguel Martín, asegurou que, “por enésima vez”, o alcalde “falta á verdade”. “A estafa é que Pedro Sánchez impón en toda España un ‘tasazo’ que non era obrigatorio”, apostilou.
O concelleiro ‘popular’ sinalou que o incremento desa taxa, que “ten a todos os alcaldes ‘de uñas'” afecta a toda España e non só aos concellos galegos, e lembrou que Sogama non presta servizo fóra de Galicia. “Pero non todos os alcaldes están en pé de guerra, hai un que non, Abel Caballero é dócil e manso ante o seu xefe. Debíaselle caer a cara de vergoña por iso, e por seguir sen explicar o novo recibo do lixo aos seus cidadáns”, sentenciou.
