O Porto de Vigo logrou superar os 5 millóns de toneladas en tráficos a falta dun mes para pechar o ano, e todos os tráficos soben, tanto no mes de outubro como en datos acumulados, salvo no caso da pesca fresca, debido ao peche da pesqueira de cerco. Así o trasladou este venres o presidente da Autoridade Portuaria, Carlos Botana, na rolda de prensa tras a celebración do Consello de Administración. “Atopámonos fronte ao mellor ano do presente século”, destacou, grazas ao bo comportamento do sector da automoción, a pesca conxelada, os metais ou a froita, entre outras mercadorías.
No mes de outubro, o tráfico total aumentou un 20 %, en máis de medio millón de toneladas, con subidas nos graneis líquidos (+59 %), en graneis sólidos (+13,5 %), mercadoría xeral (+22 %) ou en colectores (+38 %). Tamén experimentou un incremento do 41,75 % a pesca conxelada, mentres que a pesca fresca baixou case un 15 %. Igualmente, os tráficos acumulados nos primeiros dez meses do ano reflicten unha subida de case o 14 %, e destacan as subidas de colectores (+33 %) ou de vehículos (+1,29 %).
“Somos o único porto que sobe en coches en España e levamos xa dous meses consecutivos superando a Barcelona e a Valencia”, destacou Carlos Botana. Por outra banda, o Consello de Administración do Porto deu este venres luz verde a unha prórroga da concesión de Stellantis na terminal de Bouzas, o que garante a súa permanencia no porto “durante os próximos 20 anos”. Esta prórroga está vinculada ao investimento da automobilística en materia de renovables. Así, Stellantis destinará máis de 14 millóns de euros á construción dunha primeira fase dunha planta fotovoltaica na súa concesión de Bouzas, e tamén se construirá un segundo silo para coches.
Botana referiuse tamén ao acordo cos portos de Lisboa e Setúbal, no marco da 19ª Conferencia Mundial Cites & Ports da AIVP, coorganizada e acollida polo Porto de Lisboa esta mesma semana. Este acordo súmase ao alcanzado co porto arxentino de Madryn, que xa recibiu o visto e prace para a súa firma. “Estamos a asinar acordos internacionais con todos os países nos que están presentes os nosos barcos, o que nos sitúa a nivel internacional e é unha garantía de futuro para o sector”, subliñou o presidente do Porto de Vigo.
