CCOO denuncia a situación de abandono da repartición no Baixo Miño provocada pola falta de contratación para suplir as vacacións do persoal de Correos. Con porcentaxes de entre o 50 e o 70 por cento do persoal de repartición ausente por vacacións, o operador público decidiu non cubrir os postos con traballadores eventuais.
Os traballadores da cartería de Goian, cartería que cobre os concellos do Rosal e Tomiño, xa se concentraron o pasado 12 de xullo, denunciando a falta de contratación e contra as excesivas “recargas” (zonas de repartición que asumen os carteiros en ausencia doutros compañeiros). O persoal advertía do caos que se podía producir ao chegar agosto, sen contratación e cun maior número de traballadores de vacacións.
“Correos, lonxe de considerar a reclamación do persoal, continuou coa súa política de recortes“, denuncia o sindicato. Este 26 de agosto, as 14 zonas de repartición, nas que están divididos os concellos do Rosal e Tomiño, están cubertas unicamente por 6 traballadoras. No Rosal, a situación é aínda máis complicada, con só un efectivo dos 5 necesarios. Na Guarda o aumento estival de poboación agrava aínda máis o problema, provocando que se estean acumulando gran cantidade de envíos (máis de 800 notificacións) e que os carteiros estean a saír a repartición cos carros desbordados de paquetes e outros envíos postais, segundo a central sindical.
“Os poucos traballadores/as dispoñibles no sur da comarca do Baixo Miño, entre 10-13 para máis de 30.000 habitantes, están sometidos a moita presión debido á imposibilidade de asumir unha carga de traballo tan desproporcionada”, critica. CCOO esixe a Correos a contratación de máis persoal para aliviar a carga de traballo que asume o persoal e así garantir o servizo á cidadanía. De non producirse un cambio de rumbo convocaranse novamente mobilizacións sen descartar ningún escenario.
