O comité executivo da aceleradora Business Factory Auto & Mobility (BFA) seleccionou 20 novos proxectos empresariais para participar na oitava edición da iniciativa, que comezará a súa andaina en setembro co obxectivo de impulsar a innovación no sector da automoción e da mobilidade.

Tal como indicou BFA nun comunicado, esta nova convocatoria volveu a rexistrar unha “gran participación”, ao recibir unhas 130 candidaturas de diferentes países. Dos 20 seleccionados, oito son de fóra de Galicia: dous internacionais, de Holanda e Francia; e seis nacionais, de Santander, Barcelona, Madrid, Sevilla, Navarra e Lleida.

“O BFA é un referente na atracción de talento a Galicia e tamén se distingue por potenciar e canalizar o talento e a innovación galega. Unha das grandes fortalezas do sector é atraer empresas e startups a Galicia para completar a cadea de valor da industria de automoción e mobilidade”, reivindicou a organización.

En concreto, os 20 proxectos seleccionados responden os retos tecnolóxicos propostos polo sector da automoción e a mobilidade de Galicia, trasladados ao BFA por compañías como Akwel Vigo Spain, Denso Sistemas Térmicos España, Lear, Magna Seating Vigo, Maier Ferroplast, SMRC, Snop Estampación, Stellantis ou Plastic Omnium.

Así, entre eles inclúense iniciativas de motocicletas eléctricas de tres rodas para persoas con mobilidade reducida, o desenvolvemento de vehículos eléctricos modulares para a mobilidade urbana sustentable, robots para transportar e elevar cargas en almacéns ou ferramentas para a dixitalización de procesos, entre outros.