A factoría viguesa do grupo automobilístico Stellantis volverá a suspender parte da súa actividade o vindeiro luns, día 24 de xuño, por problemas de aprovisionamento de pezas. En concreto, segundo informou a compañía aos empregados, o Sistema 1 da planta, que monta o Peugeot 2008, estará parado durante as tres quendas do luns 24, volvendo ao traballo na quenda de mañá do martes, día 25.

“Por causa de forza maior, debido a dificultades de aprovisionamento, suspéndese a actividade do Sistema 1 nas tres quendas do luns, 24 de xuño”, explicou a empresa. Este parón únese ás incontables veces que Stellantis Vigo rexistrou nos últimos meses e anos debido á falta de pezas para a ensamblaxe dos seus vehículos.