Vitrasa, a concesionaria municipal do transporte urbano do Concello de Vigo, denunciou “ataques persoais” a empregados que non secundan a folga. Nun comunicado, a empresa asegurou que, desde que comezou o paro indefinido, parte dos seus traballadores sufriron “ataques violentos” e unha “persecución sistemática” que “coarta a súa liberdade”. En concreto, explicou que o último ataque coñecido foi a picada das catro rodas do coche particular dunha empregada, que estaba estacionado nas inmediacións da sede de Vitrasa.

“Ademais destes danos materiais, esta traballadora tamén sofre de forma constante o acoso á entrada e saída do seu posto de traballo, chegando ata a tentar bloquear a súa entrada para exercer o seu lexítimo dereito a traballar”, lamentou a concesionaria, que indica que preto dunha decena dos seus empregados manifestan estar sometidos a esta “persecución”, “moitos deles mesmo cando están a secundar a folga e son chamados a realizar servizos mínimos”.

A firma engadiu que, nalgunha ocasión, este “acoso” produciuse con viaxeiros a bordo dos autobuses e mesmo nun local frecuentado por traballadores, onde un empregado foi insultado publicamente por non secundar a folga. “Pola profunda violencia deste acoso sistematizado, moitos se viron obrigados a deixar de presentarse no seu posto de traballo e secundar a folga”, apostilou a compañía.

Os traballadores de Vitrasa levan anos protestando pola situación laboral que viven, debido a que o convenio colectivo caducou fai xa tres anos, manténdoselles o soldo conxelado desde esa data, pese ao incremento do prezo da vida tras a pandemia e da propia subida dos billetes de bus. Precisamente este próximo sábado, día 24 de febreiro, o comité de empresa convocou unha nova manifestación en Vigo, que comezará ás 18.30 horas en Praza de España para pedir unha solución ao conflito.