InicioEconomíaO Concello veta dous meses a asistencia aos plenos do presidente do...

O Concello veta dous meses a asistencia aos plenos do presidente do comité de Vitrasa e outros seis empregados

Vitrasa e comité emprázanse a unha nova reunión tras a última oferta da empresa dunha subida do 3 % para 2023. Nun comunicado, a propia Vitrasa puxo en valor que as súas ofertas suporían uns 2.000 euros de media a cada traballador, co obxectivo de desconvocar a folga indefinida, que comezou a finais de novembro de 2023.

PUBLICADO O

O goberno de Vigo vetou durante dous meses a asistencia aos plenos municipais ao presidente do comité de Vitrasa, Imanol Arnoso, así como a outros seis empregados da concesionaria do transporte urbano da cidade de Vigo. Nunha resolución de Alcaldía, facendo uso das competencias atribuídas no regulamento Orgánico do Pleno do Concello de Vigo, o goberno local limitou a asistencia ao pleno por un prazo de dous meses a estes sete empregados identificados polos partes da Policía Local.

Todo iso tras os incidentes ocorridos nos plenos do 28 de decembro e o 29 de xaneiro, onde foron identificadas estas sete persoas e motivaron a suspensión do acto durante uns minutos mentres eran expulsadas da sala por orde da Presidencia. Entre as súas protestas, nas actas recóllense frases como: “Levamos catro anos co salario conxelado”, “34 días con reivindicacións que non valeron para nada”, “Font mentireiro” ou “Somos traballadores pobres”.

“Vitrasa solución” e outras consideracións sobre o salario e as condicións laborais que viven na empresa foron outras das frases que gritaron no medio do pleno, obrigando a que se suspendese. Estas reivindicacións realízanse no medio dun conflito que leva activo máis de tres anos, despois de que o anterior convenio colectivo caducase a finais de 2020. Tras meses de protestas, en novembro de 2023 comezou unha folga indefinida en Vitrasa que continúa activa. Mentres tanto, os traballadores teñen o solo salarial conxelado desde o 2020.

NOVA REUNIÓN TRAS A OFERTA DE SUBIDA SALARIAL DO 3 % PARA 2023 E 2024

Vitrasa, a concesionaria municipal do transporte urbano do Concello de Vigo, e o comité de empresa emprazáronse a unha nova reunión de mediación o vindeiro xoves, día 15 de febreiro, tras a última proposta da compañía, que ofreceu unha subida salarial do 3 % para 2023 e 2024.

Así mesmo, segundo informou o presidente do comité de empresa, Imanol Arnoso, a firma tamén puxo sobre a mesa unha única paga non consolidable de 500 euros para facer fronte aos incrementos do IPC dos anos 2021 e 2022. Ademais, mantivo no encontro deste venres as ofertas sociais expostas ata a data e ofreceu eliminar un mes de vacacións se baixaba o absentismo.

Nun comunicado, a propia Vitrasa puxo en valor que as súas ofertas suporían uns 2.000 euros de media a cada traballador, co obxectivo de desconvocar a folga indefinida, que comezou a finais de novembro de 2023. “O comité de empresa segue cunhas propostas absolutamente desorbitadas para unha empresa en condicións de perdas económicas, cunha actitude de chantaxe cara á empresa e facendo reféns aos seus propios compañeiros”, criticou Vitrasa.

Ante esta postura, a mediadora suspendeu o encontro ata o vindeiro xoves, día 15, ás 09.30 horas. O deste venres foi o terceiro encontro de mediación levado a cabo entre Vitrasa e o comité esta semana, despois de que a compañía aceptase novamente unha mediación que, do mesmo xeito que a finais de 2023, é realizada por unha inspectora de traballo.

ÚLTIMAS

Encontran o cadáver desmembrado dunha muller dentro dunha maleta nun solar de Vigo

Un home achou na tarde deste xoves un cadáver en avanzado estado de descomposición,...

Dúas persoas trasladadas ao hospital por un incendio nun edificio en Nigrán

Dúas persoas foron trasladadas, unha delas con queimaduras, tras producirse un incendio, que se...

A xestora do PP de Vigo promete unha “transición modélica” cun partido “unido”

A xunta xestora que asumirá as rendas do PP de Vigo tras a renuncia...

A Xunta destinará 1,8 millóns de fondos europeos facer do Mosteiro de Oia un gran establecemento turístico

Case dous millóns a facer do Mosteiro de Oia un gran establecemento turístico no Camiño...