O presidente de Abanca, Juan Carlos Escotet, asegurou que o banco aparcou “a procura dun socio industrial para Nueva Pescanova, polo que na actualidade está a abordar un proceso de posicionamento da compañía para fortalecer o seu proxecto empresarial.

Así o sinalou o directivo durante a presentación dos traballos de transformación da sede de Abanca en Vigo, onde indicou que se priorizou a implantación do plan estratéxico de Nueva Pescanova para “fortalecer” o seu proxecto empresarial. “Cremos que ten moito máis valor executar o proxecto e emprazar a procura de socio industrial. Sempre haberá tempo para iso. Non é a nosa prioridade. A empresa vai ben“, reivindicou Escotet, tras ser preguntado polos medios de comunicación sobre a situación da empresa.

Así, destacou que para Abanca a firma é “prioritaria” debido ao seu valor para Vigo e para Galicia, o que se demostra, segundo Escotet, no nivel de investimento que se executou ao longo dos últimos anos. Todo iso tras uns meses de negociacións na procura dun socio industrial. Negociacións que chegaron ao seu fin “de mutuo acordo” por ambas as partes, polo que Abanca decidiu continuar a súa folla de ruta mantendo a propiedade.

A nova estratexia empezou coa incorporación de Jorge Escudero como novo conselleiro delegado o pasado mes de setembro. Xa en outubro, Nueva Pescanova abordou a adaptación do persoal á situación real da firma, cun expediente de regulación de emprego (ERE) que afectou a uns 76 traballadores de oficinas.

EDIFICIO FRAGA

Escotet tamén foi preguntado sobre a situación do edificio Fraga en Vigo, que pertence a Abanca e leva anos pechado. El recoñeceu “avergoñarse” por non ter unha solución para o inmoble, a pesar de transcorrer tanto tempo.

Aínda así, indicou que si se lle deu “moitas voltas” para pensar “posibles alternativas” para esas instalacións, co obxectivo de pór en valor un edificio “tan emblemático” para a cidade. Na actualidade, segundo dixo, están a estudarse un par de ideas que “oxalá cumpran coa expectativa”, sentenciou.