O estadio municipal de Balaídos incrementará o seu aforamento a próxima tempada 2025/2026 para que o Real Club Celta poida volver competir na Europa League. Segundo explicou o alcalde, Abel Caballero, o Celta xogará a próxima tempada a Europa League, competición para a que a UEFA ten unha serie de esixencias para os estadios que alberguen os seus partidos, como obrigar a reservar unha parte do aforamento para afeccionados visitantes ou compromisos.
Por iso, o rexedor avanzou actuacións que permitirán aumentar a capacidade do estadio mentres se desenvolven as obras da bancada de Gol. Así, Río Baixo incrementará uns 600 asentos co incremento de tres filas cara o céspede, mentres que Marcador gañará uns 500. Entre outros, tamén se instalará unha bancada desmontable con outros 500 asentos. En total, mentres duren as obras, Balaídos contará con capacidade para preto de 22.800 espectadores, esperando a que dentro dun ano e medio suban ata os 30.000 tras o fin dos traballos de Gol.
