A xunta de goberno local de Vigo aprobou a adxudicación da bancada de Gol de Balaídos por 24,8 millóns de euros, que será financiada a partes iguais polo Concello e a Deputación de Pontevedra e estará finalizada en 2027. Nun audio difundido aos medios de comunicación, o alcalde, Abel Caballero, anunciou que a obra, que durará 29 meses, foi adxudicada ao grupo Copasa e consistirá na construción dunha bancada “xemelga” ao Marcador Centenario, para terminar así a reforma do estadio, iniciada hai case 10 anos.

O rexedor explicou que a nova bancada terá aforamento para uns 6.400 espectadores e estará situada a uns oito metros de distancia do terreo de xogo. Contará con seis escaleiras e oito ascensores que tamén darán servizo ao resto de bancadas. Ademais, a obra inclúe unha intervención na fachada de Tribuna (xa reformada) para crear un novo pórtico e así facilitar a mobilidade dos afeccionados fóra do campo.

Tras estas palabras, Caballero reivindicou que, en algo máis de dous anos, as obras estarán acabadas e o campo estará “perfectamente preparado”. “Gustaríame que a Federación Española de Fútbol dixese que campo está en mellor condición que o de Vigo neste momento para ser sede do mundial, porque o campo xa está feito, xa está contratado”, volveu a insistir o alcalde. A pesar disto, dixo que a bancada está feita para os afeccionados do Celta e para o goce do fútbol.