A Deputación de Pontevedra destinará uns 100.000 euros para dar visibilidade ás mulleres artistas no Museo de Arte Contemporánea de Vigo (Marco), un 67% máis que en 2022.
Segundo a institución provincial, o aumento do investimento para o ano 2023 supón “un salto cualitativo que permitirá reforzar a programación expositiva das artistas e as accións complementarias”, ademais do “mantemento da aposta da Deputación de Pontevedra pola promoción das artistas ao divulgar as súas creacións”.
Ás exposicións temporais e as visitas guiadas, tal e como indicou a Deputación de Pontevedra nun comunicado, o proxecto suma para o próximo ano unha programación dirixida a escolares e persoas con necesidades específicas, así como talleres infantís en torno ao traballo das creadoras.
Ademais, a achega económica da institución provincial abarca as mostras bibliográficas e documentais, con selección de catálogos e publicacións, que a Biblioteca-Centro de Documentación do Marco presentou en paralelo ás exposicións.
“O Marco establecerá as accións a incluír nesta nova aposta da Deputación de Pontevedra pola igualdade e a cultura con nome de muller”, destacaron desde a institución provincial.
