InicioCultura'Histérikas Histórikas': humor, feminismo e cultura dende Vigo e para o mundo

‘Histérikas Histórikas’: humor, feminismo e cultura dende Vigo e para o mundo

Trátase dun podcast que se grava todos os mércores no café UF con entrada libre e gratuíta e que coloca no centro as mulleres e o seu coñecemento.

PUBLICADO O

Un programa en formato televisivo que mestura feminismo, humor, cultura, actualidade, e está feito en galego. Esta é a proposta de ‘Histérikas Histórikas’, un novo podcast que naceu hai pouco en Vigo e que procura financiamento para seguir adiante máis alá de xuño. O programa grávase todos os mércores no café UF con entrada libre e gratuíta, dende onde tamén se emite a través das redes sociais do programa.

Dirixido e producido por Franco Tedesco, o obxectivo do espazo “é chegar a todas aquelas persoas que teñen unha idea equívoca do feminismo, e poder comunicar que é realmente e de que elementos se compón, sen entrar en gretas nin divisións”, explica o equipo, que tamén procura visibilizar iniciativas de emprendemento local e ser un lugar seguro para as persoas que non teñen espazo de expresión nos medios habituais.

Aos mandos de ‘Histérikas Histórikas’ está a politóloga especialista en xénero Priscila Retamozo, con longa andaina no activismo e con habilidade para compaxinar coñecemento e humor. Tras un monólogo inicial presentado por ela mesma, o programa ofrece entrevistas con convidadas moi variadas, desde a humorista Arantxa Treus, pasando pola psicóloga streamer ‘Psicowoman’, o grupo de música Las Ketekalles, ata a cantante de rap Sara Hebe, que sentará na mesa do Café UF proximamente.

Todo isto acompañado tamén polas seccións de Amara Pérez, encargada de traer libros e outras expresións culturais que teñen que ver co tema tratado en cada programa – unha “mestura imperfecta entre cultura e salseo” – segundo explica; e Lucía Salgueiro, que introduce o público no que ela mesma define como un “horóscopo cartesiano e escéptico nun mundo banalmente supersticioso”. Disfrazada de raposa, Salgueiro resolve dende o humor as dúbidas expostas polo público presente,con dubidosos procedementos que dan lugar a todo tipo de confusións e tolemias.

Aínda que a iniciativa comezou en agosto de 2021, non foi ata febreiro deste ano cando se decidiron a desenvolver o programa con público, e foi entón cando cambiaron o idioma de español a galego. “Parecíanos tamén unha forma de mostrar sensibilidade co local”, explica o equipo.

“Se buscas rir, aprender, compartir e emocionarte, non podes faltar á cita dos mércores no Café UF ás 20 horas”,  animan. O programa sae en vivo pola plataforma Twitch e súbese logo a youtube os domingos na súa versión editada.

ÚLTIMAS

O BNG pide grupos e artistas locais en Castrelos, tamén como teloneiros, no canto do “autobombo” do alcalde

O grupo municipal do BNG en Vigo volveu a pedir un ano máis que o Concello...

Detido por exhibicionismo un home que se facía tocamentos e se masturbaba na praia viguesa de Samil

Axentes da Policía Local de Vigo detiveron a un home de 42 anos de idade, A.D.,...

Deteñen en Vigo a un mozo de 18 anos por unha suposta agresión sexual e intervéñenlle unha pistola simulada

Axentes da Policía Local de Vigo detiveron este domingo a un mozo de 18 anos...

Decaltado incendio na fábrica de casas de madeira 5Jotas en Candeán

Solicitouse asistencia sanitaria para unha persoa debido a unha crise de ansiedade, mentres que...