A 38ª Mostra de Teatro Cómico e Festivo de Cangas (MITCFC), que se celebrará entre o 1 e o 10 xullo nesta localidade do Morrazo, renderá este ano homenaxe ao que foi alcalde ata o seu falecemento (en xaneiro pasado) e un dos creadores deste certame cultural.

O MITCFC foi presentado este martes en Cangas, nun acto no que se avanzou a programación do evento e confirmouse que, nesta edición, renderase homenaxe a Xosé Manuel Pazos, quen foi alcalde deste concello desde 2015 ata a súa morte en xaneiro pasado, e que foi un dos impulsores da Mostra nos seus inicios, a través da asociación Xiria.

Esta cita cultural, cuxo cartel foi deseñado por Leandro Lamas, arrincará o 1 de xullo coa inauguración dunha exposición documental e unha homenaxe a Pazos. “Queremos facer un recoñecemento á súa persoa e ao seu labor”, sinalaron desde a organización, e confirmaron que a lectura do pregón, a cargo do actor Fran Paredes, realizarase o 2 de xullo.

Ademais das representacións, a programación completarase con obradoiros, charlas e coloquios. Así mesmo, entregarase o Premio Xiria ao labor teatral ao narrador, xornalista e crítico teatral Camilo Franco, e entregarase así mesmo o galardón ‘Abrandares en Acción’ á cineasta, escritora, investigadora e docente Margarita Ledo.