A presidenta da Deputación de Pontevedra, Carmela Silva, presentou a nova marca desenvolvida pola institución para axuntar e fortalecer os principais festivais audiovisuais da provincia, ‘Rías Baixas Filme Fest’, e avanzou a creación dun comité asesor do sector.
Durante un acto celebrado este mércores en Vigo, Silva puxo en valor a capacidade “transformadora” destes eventos e a súa fortaleza e remarcou que “traspasan fronteiras” a nivel autonómico, estatal e internacional. Ademais, destacou o seu “compromiso” coa lingua e a cultura de Galicia, así como o labor que exercen na promoción dos produtos audiovisuais creados na comunidade.
Así, a presidenta da Deputación Provincial detallou que o desenvolvemento desta marca foi proposto polos promotores dos eventos, que “consideraban que serían máis fortes unidos”, e avanzou a creación do comité asesor que reclaman. Sobre este último, precisou que permitirá “facer promoción e que os festivais sexan aínda máis capaces de abrir fronteiras e chegar a máis sitios”.
Adicionalmente, Carmela Silva resaltou a posta en marcha un protocolo común de medidas de seguridade no marco do que a Deputación de Pontevedra achegará medidores de temperatura, instrumentos para marcar a distancia interpersoal e elementos identificadores dos circuítos de entrada e saída. Tamén se instalarán carteis con información sobre as medidas de seguridade obrigatorias e contadores de asistentes.
Así mesmo, o director de Play-Doc, Anxo Sánchez, subliñou o papel exercido polo cinema para “formar espectadores críticos” e “lograr a transformación social na contorna“. Así, recalcou a influencia do sector na economía e a proxección da provincia fóra da mesma e asegurou que a nova marca permitirá incrementar a visibilización e a profesionalización do sector, ademais de “dignificar a cultura”.
Tamén os concelleiros de Cultura de Bueu, Vilagarcía, e Tui, Xosé Leal, Sonia Outón e Sonsoles Vicente, respectivamente, afirmaron que esta marca favorecerá a suma de “esforzos” e o fortalecemento do sector.
FESTIVAIS INTEGRADOS
En concreto, ‘Rías Baixas Filme Fest’ integrará nove eventos audiovisuais dos que catro se celebrarán en setembro: Cans (do 2 ao 5 no Porriño), Primavera de Cinema (do 15 ao 20 en Vigo), FIC Bueu (do 11 ao 19) e Play-Doc (do 23 ao 27 en Tui).
Ademais, Vigo acollerá o Festival Again de Cinema Inclusivo do 13 ao 17 de outubro e o Curtas Festival do Imaxinario terá lugar en Vilagarcía entre o 23 de outubro e o 1 de novembro. Tamén a cidade olívica será o escenario do Galicia Freaky Filme do 28 ao 31 de outubro e Pontevedra acollerá Novos Cinemas do 15 ao 20 de decembro, mentres o Curtas Armadiñas de Poio non celebrará a súa edición deste ano.
