A galería Apo’strophe.arte acolle no seu Espazo Anexo unha exposición da fotógrafa bilbaína afincada en Vigo Susana Álvarez titulada ‘Humanos’.

“Quen non tivo algunha vez a sensación de que todo o que lle rodea está como noutra atmosfera? Con esta sensación, como nun soño lúcido, imaxino imaxes coas que reflexiono sobre o tempo, o control no que nos vemos mergullados, a existencia e as nosas crenzas, como algo efémero, incontrolable e fóra de lugar”, reflexiona a artista.

Sobre o seu proceso creativo, conta que utiliza elementos simbólicos para recrear unha idea. “E esta queda aberta á libre interpretación do espectador. As miñas imaxes axúdanme a organizar a miña mente para entender unha realidade creada nelas e que busca que o que a observe, entre nun soño de ilusión. Porque talvez o ceo non sexa azul”.

A exposición está aberta ao público en horario de 10.00 a 22.00 horas, de luns a domingo, na sala que está no Centro Comercial Praza Elíptica.