Os traballos de peonalización da Porta do Sol, en Vigo, acaban de sacar á luz os restos do que podería ser o sistema defensivo da muralla do século XVII e a antiga Porta do Sol. Uns restos que están sendo catalogados polo Concello dentro dos traballos do túnel da Porta do Sol.

Estás obras están autorizadas pola Xunta pero “cunha serie de cautelas”, tal e como apuntan desde a Consellería de Cultura a Xornal de Vigo. O Concello de Vigo presentou un estudo a Patrimonio das obras que ía realizar en toda a zona. Un informe que foi autorizado pola Xunta en outubro do pasado ano e que recolle realizar “un control de área” das escavacións que se realizan na contorna da Porta do Sol e un “total control arqueóloxico de todas as obras”.

Desde a Xunta suliñan que, dependerá dos achados que se atopen nela, a continuidade ou non desas obras ou a “conservación” dos tramos da antiga muralla e portas da cidade en función da súa importancia. “Supoñemos que o arqueólogo de Vigo que é un profesional saberá o que mellor convén e que logo nós supervisaremos”, apuntan.

“CUMPLIMENTO DA RESOLUCIÓN DE PATRIMONIO”

No proxecto presentado a Patrimonio,segundo apunta o Concello de Vigo, está o “rexistro da traza e características dos escasos restos [da antiga muralla do sećulo XVII] que poidan quedar”, no tramo comprendido entre o edificio Simeón e a rúa Carral. “Iso é precisamente o que estamos a facer nestes momentos, concluír coa catalogación da antiga muralla da cidade antes do inicio da obra propiamente dita, dando cumprimento á resolución de Patrimonio da Xunta de Galicia”, sinalan dese o consistorio municipal.

Por iso, “lamentan” que o Goberno de Núñez Feijóo “estea a xerar alarma con filtracións interesadas”. “Este Goberno, co seu alcalde á fronte, é o maior garante da conservación do patrimonio histórico da cidade, tal e como se está a facer por exemplo no Barrio do Cura, mantendo a fachada do antigo asilo que o anterior goberno do PP ía tirar”, indicaron nun comunicado.