O Festival de Cans seleccionou nove curtametraxes que exploran variantes do documental e do cinema experimental para proxectalos o próximo 25 de maio no marco da competición de non-ficción FuraCans.
Deste xeito, búscase mostrar unha panorámica do traballo que levan a cabo as xeracións máis novas do cinema galego, na súa maior parte, nacidas ao redor da década dos 90, segundo trasladaron os organizadores.
As entradas están dispoñibles desde este martes a un prezo de seis euros na páxina web do festival e o aforamento será limitado, xa que só poderán asistir 180 persoas ao pase matinal e 90 ao de tarde.
En concreto, proxectarase a documental ‘Hora silenciosa’, de Noelia Muíño, que aborda a vida das monxas de clausura do convento de San Paio de Antealtares; así como a obra de Brandán Cerviño ‘Na boca da mina’, gravada na antiga cidade mineira do Cobre, en Cuba.
Tamén se presentarán ’16-11-2016 / 13-5-2017′, que explora parte da vida de Marta Valverde, e ‘Devalar’, no que Mar García retrata a súa aldea. ‘Cando mamá pechou as caixas’ tamén ten un compoñente persoal, xa que aborda o peche dun negocio da familia da súa creadora, Arancha Brandón.
Ademais, ‘Palmira’ presenta a historia dunha antepasada de Rebeca Lareira, mentres que ‘In touch with the infinite’, de Alejandra Pombo, viaxa cara aos adentros da natureza. FuraCans tamén proxectará dúas pezas experimentais en canto ás imaxes e os sons, ‘Como desaparecer’, de Carlos Martínez-Peñalvar; e ‘Caerán lóstregos do ceo’, de Adrián Canoura.
