O Diario Oficial de Galicia (DOG) recolle este luns a resolución da Consellería de Presidencia, Xustiza e Deportes pola que se acorda a aprobación definitiva do proxecto de expropiación, por taxación conxunta, dos bens e dereitos afectados pola execución da etapa 1 do proxecto de interese autonómico Factoría do Deporte Galego-Galicia Sports 360, no Concello de Mos.

Esta aprobación definitiva implica a declaración de urxencia da ocupación destes bens, que inclúen unhas 14,8 hectáreas de monte comunal da parroquia de Pereiras, en Mos. “En consecuencia, o pagamento ou depósito do importe da valoración establecida producirá os efectos previstos nos números 6, 7 e 8 do artigo 52 da Lei de 16 de decembro de 1954, sobre expropiación forzosa (LEF), sen prexuízo de que continúe a tramitación do procedemento para a definitiva fixación do xustiprezo”, engade o DOG.