O alcalde de Vigo, Abel Caballero, anunciou que a cidade celebrará a XXXI edición da Festa da Reconquista a partir do 22 de marzo, sendo os días grandes a fin de semana do 28 ao 30 dese mes. En rolda de prensa, o rexedor presentou o programa da festa, que comezará o 22 de marzo coa representación da destitución do alcalde, mentres que o 30 será a expulsión das tropas francesas.

Segundo dixo Caballero, a Reconquista trátase da “maior romaría urbana de Galicia”, polo que o Concello incrementará a súa achega un 8 % este ano, ata 135.000 euros. Os tradicionais postos do mercado instalaranse desde o venres 28 ao 30 de marzo, polo que a partir do 24 de xaneiro xa estarán dispoñibles na páxina web do Concello as bases para solicitar un oco.