O consello da Xunta foi informado este luns do acordo entre o goberno galego e a Deputación de Pontevedra para a adquisición do antigo Teatro Cinema Fraga por 9,3 millóns de euros (51 % achegado pola administración autonómica e 49 % pola provincial), co fin de completar a súa rehabilitación e destinalo a fins culturais.

Así o trasladou Alfonso Rueda na comparecencia posterior ao Consello, na que sinalou que o obxectivo de ambas as administracións é converter o edificio nun “centro cultural pioneiro e de referencia no noroeste de España”.

O Teatro Cinema Fraga, pechado desde 2001, pertence ata agora a Abanca e, unha vez completada a operación, técnicos da Consellería de Cultura, Lingua e Xuventude avaliarán o seu estado actual e as necesidades de rehabilitación para elaborar un proxecto e, posteriormente, un plan de usos.

A inmoble conta, entre outros espazos, cun gran teatro de 1.600 butacas e un foso para orquestra, así como unha sala de festas que será reformada para actividade expositiva, actividades de creación cultural e con participación de colectivos do tecido artístico e cultural de Vigo.