A cidade de Vigo acolle durante toda esta semana a quinta edición do campus internacional de danza urbana DÁ Summer, organizado polo club DÁ Vigo contando coa colaboración da Autoridade Portuaria e co patrocinio da Xunta de Galicia.

Precisamente a andrómena do Porto é o lugar onde se desenvolve o campus, que conta cunha selección dos mellores profesores nacionais e internacionais de danza urbana, que impartirán diferentes disciplinas a un grupo de bailaríns de todas as idades e niveis procedentes de distintas partes de España e doutros países, segundo recolle a organización nun comunicado.

“O evento promove a formación de bailaríns con profesores de diferentes países e compleméntase con actividades lúdicas e deportivas que permitan o crecemento da comunidade da danza, así como ofrecer a posibilidade de coñecer a nosa cidade e as súas marabillas”, engadiron.

En concreto, levarán a cabo actividades acuáticas como vela, paddle surf ou kaiak, así como unha viaxe ás Illas Cíes. Ademais, o campus finalizará o sábado cunha batalla con diferentes categorías, onde os asistentes poderán pór en práctica todo o aprendido.