A XX edición do Festival de Cans, que se celebra entre o 16 e o 20 de maio, comeza este fin de semana cunha programación previa no Porriño que inclúe unha retrospectiva da cineasta Valérie Massadian, a apertura dunha exposición de collage de Diego Giráldez e a presentación do novo proxecto musical de Eladio Santos, Ronsel, acompañado por Andrés Cunha. Todas estas actividades son gratuítas.

A programación especial que ofrece nesta edición o festival sobre a directora franco-armenia empeza o venres 12 ás 20,00 horas coa proxección da súa longametraxe de debut, Nana (2011), mellor película no Festival de Locarno, mentres que o sábado 13 ás 18,00 horas proxectarase Milla (2017), Premio do Xurado e do Público no Festival de Locarno.

As proxeccións serán no Centro Cultural do Porriño e son a primeira parte da retrospectiva que lle dedicará o festival o día 20, coa exhibición da súa obra como cortometrajista, con títulos como América (2013), Ninouche (2011), Solitudes. L’insomnie (2019), A tempête (2018), Care (2022), Mamoushka (2014) e Ire (2021). Destacan ademais que moitas delas están inéditas en España. Massadian intervirá por videoconferencia antes da proxección da primeira longametraxe e estará presente en Cans durante o festival.

Xa o sábado 13, ás 20,00 horas, inaugurarase a exposición Collage Catástrofe, do xornalista e escritor Diego Giráldez, na que se mesturan mulleres “que poderían protagonizar unha comedia romántica de Frank Capra con homenaxes ao cinema de catástrofes dos anos 70”. A mostra poderá verse no Círculo Recreativo Cultural do Porriño ata o 31 de maio.

Tamén o sábado, na terraza do Círculo Recreativo, terá lugar ás 21,00 horas a presentación de Ronsel, novo proxecto de Eladio Santos (Eladio e os Seres Queridos). Trátase unha iniciativa organizada polo Círculo Recreativo Cultural dentro do ciclo ‘Círculo Aberto’, como previa da XX edición do Festival de Cans.