O Festival de Cans, cuxa XX edición terá lugar nesta aldea do Porriño do 16 ao 20 de maio, elexiu para a súa sección competitiva Furacáns un total de dez curtametraxes, das cales seis serán estreas e oito están dirixidas por mulleres cineastas. Esta sección está dedicada a obras de non ficción e a autores e autoras que “na maioría dos casos asumen riscos narrativos afastándose de fórmulas máis convencionais”, segundo explica a organización do certame cinematográfico.
Entre as estreas que terán lugar en Cans estarán My Truth, unha curtametraxe que reflexiona sobre a conexión entre imaxes e diferentes testemuñas relacionadas coa saúde mental, dirixida pola debutante Marta Bouzas. Tamén Ningún Deus, de Miriam Opazo, un achegamento autobiográfico ao entroido ourensán a través das máscaras, a identidade e a iconografía.
Tamén se poderá ver por primeira vez rematada a obra Notas sobre a violencia de Marta Valverde, unha montaxe sobre a normalización da violencia na vida cotiá a partir de textos de Remedios Zafra. Outra das estreas é Envés, o novo traballo da cineasta Ángeles Huerta, directora do filme O Corpo Aberto. As dúas obras restantes que terán a súa estrea en Galicia son Tegoyo, de Guillermo de Oliveira, e A lingua resiste no estómago dun agricultor morto, de Acacia Ojea.
En Furacáns tamén estará a curta Hondarrak, de Marta Gómez e Paula Iglesias. “Unha mirada con perspectiva feminista que afronta a crise dos coidados e cuestiona un modelo que permanece inamovible”, sinalan os organizadores do festival. Ademais, a memoria histórica tamén está presente nesta sección con Mariví, na pel da memoria das irmáns Coral e Laura Piñeiro, sobre a vida de resistencia da galega Mariví Villaverde.
As curtas que completan a sección son O amor é auga que corre, da cineasta Claudia Pineda, na que constrúe un ensaio poético sobre o amor ligado á vida e á morte e Malgrat, un relato autobiográfico construido a partir dun arquivo familiar, obra de Santi Teijelo.
