O humorista arzuán, Xan Veiga, chega este sábado 11 de marzo a Vigo para ofrecer unha gran noite de comedia. Será no Sports Bar Castelo Real, na Avenida Florida 66, ás 23:00 h.
Xan Veiga estivo no Luar da TVG máis de sete anos contando contos e chistes co cal a experiencia no mundo da narración oral e os recursos para facer rir non lle faltan. Dende hai uns anos arrimoulle experiencias e anécdotas á súa vivencia persoal e creou este texto que resulta unha simpática e retranqueira volta aos 80 co galego sempre presente nesa experiencia vivencial.
O ESPECTÁCULO
O monólogo “Made in Galicia” embárcase nunha viaxe ao pasado para lembrar as desventuras dun galego calquera, unha especie de Balbino actualizado. Xan Veiga trae á memoria un bo feixe de costumes, ditos, xogos, cantigas e outras lerias que fan pensar aos espectadores no moito que cambiaron as cousas dende aquela.
Ao longo do espectáculo ponse en valor o galego como lingua recorrendo ao inspiradora e útil que resulta para comunicar e para manexar a nosa ferramenta principal: a retranca. A entrada custa 6 euros.
