“Tui con Orgullo” é un programa impulado pola Concellería de Igualdade do Concello de Tui que pretende celebrar a diversidade e loitar contra a LGTBIfobia, con motivo do 28 de xuño, Día Internacional do Orgullo LGTBIQ. Esta iniciativa está chea de música, contacontos infantís, encontros escolares e charlas informativas que xa comezaron a realizarse este xoves.
Ademais de dirixirse aos nenos e adolescentes, este programa tamén ofrece conferencias para o público adulto que se celebrarán na Sala Municipal de Exposicións o xoves 24 e o luns 28 de xuño ás 20 horas, con entrada libre ata que se complete a capacidade.
Para os nenos máis pequenos, de entre 3 e 9 anos, haberá unha sesión de contos o luns 28 de xuño ás 18:30 horas na Sala Municipal de Exposicións. Nesta actividade a través de contos e xogos verase que hai moitos tipos de familias, de formas de ser e de querer, e que todas son válidas se hai amor e respecto.
Con “Tui con orgullo” a Concellería de Igualdade inaugurou no Concello de Tui unha nova liña de traballo cara á visibilización e dignificación da diversidade de sexo en xénero, de cara a conseguir unha sociedade máis xusta e igualitaria, libre de discursos de odio e respectuosa coas distintas formas de ser e de querer.
