A mancomunidade do Baixo Miño inicia a próxima semana un calendario de mobilizacións en protesta pola “deterioración” da atención primaria nos municipios da comarca.

As alcaldesas e alcaldes da mancomunidade acordaron articular unha axenda de protestas en xaneiro e febreiro para “denunciar a situación de precaridade e o continuo desmantelamento da sanidade pública” nos seus concellos.

Así o recolle un comunicado no que convidan os veciños e as plataformas da zona a sumarse a estas protestas, que arrincarán o vindeiro mércores 12 de xaneiro na praza do Calvario do Rosal.

As seguintes citas serán o 26 de xaneiro en Tomiño e o 9 de febreiro en Tui. Pechará a rolda de protestas a mobilización convocada o 23 de febreiro na Guarda.