O alcalde de Vigo, Abel Caballero, celebrou este mércores que a cidade “petou” durante o mes de decembro, neste caso, polo incremento no número de pasaxeiros que chegaron polo aeroporto de Peinador.
Nunha rolda de prensa, o rexedor olívico explicou que o aerodrómo vigués recibiu en decembro a 86.380 viaxeiros, o que supón un 27,5 % máis con respecto ao mes de decembro de 2019. Así mesmo, incrementáronse nun 37,3 % as operacións e Peinador foi, segundo recalcou Caballero, “o aeroporto galego que máis creceu en decembro”.
Todo iso, recalcou, “operando a mercado” e sen as subvencións que, repetiu, recibe o aeroporto de Santiago, cuxas compañías teñen o apoio económico da Xunta a través de contratos publicitarios que, engadiu, o goberno galego “oculta”.
VISITANTES DURANTE A CAMPAÑA DO NADAL
Por outra banda, o grupo municipal Marea de Vigo denunciou este mércores que o goberno de Abel Caballero está “a manipular e esaxerando” os datos sobre o número de visitantes á cidade durante a campaña do Nadal (desde mediados de novembro a mediados de xaneiro).
O portavoz de Marea, Rubén Pérez, sinalou que o rexedor estima o número de turistas entre 2 e 3 millóns, pero “a realidade é que o cálculo está feito empregando os datos de posicionamento GSM do Ministerio de Transportes, Mobilidade e Axenda Urbana”, que rexistra os dispositivos móbiles que se atopan na cidade, sen estar rexistrados nela, pero sen valorar se son persoas que chegan a Vigo por motivos laborais, comerciais, de lecer ou calquera outro.
Para este grupo municipal, a interpretación do goberno local é “moi tendenciosa” e criticou a “necesidade de esaxeración permanente dun alcalde que roza o ridículo”, sen ter necesidade, posto que os datos de ocupación hoteleira e de visitas son “bos”.
