O Xulgado do Social número 5 de Vigo estimou a demanda dunha delegada da CIG pertencente ao comité de empresa da Autoridade Portuaria de Vigo (APV) por vulnerar o dereito de “liberdade sindical”.
Segundo informou a CIG nun comunicado, a sentenza anula o nomeamento resultante dun proceso de mobilidade funcional cuxos criterios “cambiaron para deixar fóra á representante da central sindical, conculcando os principios de igualdade, mérito e capacidade”.
O fallo dos xuíces, contra o que se pode presentar recurso ao Tribunal Superior de Xustiza de Galicia (TSXG), tamén condenou ao Porto de Vigo a abonar á afectada as diferenzas salariais de todo o período que o traballador nomeado tras o proceso, agora anulado, estivo a desenvolver funcións de superior categoría, tarefas que realizou a partir do 8 de novembro de 2021.
Desde CIG lamentaron a “actitude discriminatoria” da APV coa “complicidade doutros sindicatos” ao cambiar o criterio establecido para as mobilidades funcionais, desmarcándose así do modelo de xestión por competencias regulado no convenio colectivo.
