Un helicóptero medicalizado de Urxencias Sanitarias de Galicia-061 acudiu ao concello pontevedrés das Neves para atender a unha persoa tras sufrir múltiples picaduras de avespas velutinas.
Segundo informa o 112 Galicia, a voz de alarma deuna un familiar da vítima, sobre as 10,30 horas, desde a parroquia de Santa María de Taboexa. Alertaba de que o implicado sufrira o ataque dos insectos e que “presentaba importantes dificultades para respirar“.
Entón, o 112 solicitou a colaboración do 061 e da Garda Civil, que se encargou de asegurar a zona. Ante a potencial gravidade da situación, o persoal sanitario foi mobilizado a bordo do helicóptero medicalizado con base en Ourense, que tomou terra nas Neves minutos antes das 11,00 horas para atender á persoa.
