Case 1.200 persoas sumaranse este domingo á X Carreira Solidaria ‘Eu Móvome pola Esclerose Múltiple’ organizada pola Asociación Viguesa Avempo, que pechou as inscricións para a proba presencial con 1.164 participantes anotados para os percorridos de 5 e 10 quilómetros e a ‘andaina’.

Por iso, dita asociación agradeceu o “gran apoio social” recibido nos últimos días tras o seu chamamento debido á crise que atravesa polos problemas de financiamento do evento.

Para poder seguir recadando fondos para a causa, a entidade manterá as inscricións abertas ata o domingo na modalidade virtual da carreira e os donativos a través do ‘Dorsal 0’ solidario.