Un home enfróntase a unha petición de dez anos e nove meses de cárcere por violar a unha muller en Vigo e agredir a tres axentes de policía que acudiron ao lugar ao que arrastrara á vítima.

O xuízo contra este individuo, de nacionalidade colombiana e que se atopa en prisión preventiva fai máis dun ano, terá lugar o vindeiro venres 14 de outubro na Audiencia Provincial de Pontevedra.

Fiscalía solicita para o procesado unha condena de dez anos e nove meses de cárcere polos delitos de violación e resistencia á autoridade, ademais do abono dunha multa por un delito leve de lesións.

Os feitos tiveron lugar o 16 de xullo do ano 2021, cando, segundo o escrito de acusación do Ministerio Público, o acusado agarrou e arrastrou á vítima ata un canellón escuro da rúa Sanjurjo Badía aproveitándose de que se atopaba baixo os efectos do alcol. Alí, o procesado empezou a violar á muller mentres esta se resisitía e trataba de zafarse. Os berros alertaron a un veciño, que chamou á policía.

Minutos máis tarde, unha dotación policial chegou ao canellón, o que provocou que o presunto violador tratase de fuxir. Finalmente, logrou ser interceptado polos axentes, que resultaron feridos no forcexeo.

Ademais da pena de cárcere, Fiscalía tamén solicita para o acusado unha multa de máis de 1.600 euros e indemnizacións que suman máis de 16.000 euros para os axentes de policía que sufriron feridas.

Con todo, a pesar de que o procesado atópase en situación administrativa irregular en España, o Ministerio Público non pide a súa expulsión do país ata que acceda ao terceiro grao penal, en caso de ser condenado.