A visita teatralizada ao patrimonio xudeo tudense, unha actividade que forma parte da programación do Concello de Tui para a celebración da Xornadas Europeas da Cultura Xudía na cidade, terá lugar este domingo, 11 de setembro, a partir das 12 horas.

O percorrido comezará na Oficina Municipal de Turismo, no Paseo da Corredoira, e contará en tres momentos coa presenza de personaxes vinculados á presenza dunha comunidade xudía no Tui medieval noutras tantas localizacións do conxunto histórico tudense.

Deste xeito, as persoas participantes poderán achegarse ao coñecemento deste legado histórico e cultural a través de varias escenas teatralizadas. O alcalde de Tui, Enrique Cabaleiro, sinalou que “temos a sorte de contar en Tui con testemuños materiais e inmateriais que permiten coñecer e pór en valor este importante e enriquecedor patrimonio ligado ás comunidade xudías e criptoxudías tudenses”, e lembrou que a “Ruta xudía” está sinaliazada e pode seguirse en calquera momento.

XORNADAS GASTRONÓMICAS

Igualmente, esta fin de semana finalizan as Xornadas Gastronómicas sefardís dedicadas ao bacallau, que contan coa oferta de pratos sobre especialidade nos seguintes establecementos tudenses: Parador de Tui (co prato ‘Bacallau gratinado con emulsión suave de allo e repolo’) e Gastrobar Trisco do Miño (con ‘Bacallau á portuguesa’).