Adif renovará a infraestrutura e a vía do tramo Estación de Guillarei-Fronteira portuguesa, pertencente á liña Guillarei-Valença do Minho, co obxectivo de mellorar a conexión ferroviaria entre España e Portugal.

Segundo explica o ente público nun comunicado, o proxecto inclúe a explanación, limpeza e regularización de cunetas e noiros, a execución de muros de dique, actuacións de reparación e reforzo en diferentes pasos inferiores e a execución dun muro de contención nalgúns puntos do trazado complementados coa aliñación de ancoraxes do muro entre outros.

Tamén se actuará na estación de Tui, que quedará adaptada para o servizo internacional de viaxeiros e o estacionamento de trens de mercadorías de 750 metros de lonxitude.

Unha das obras previstas en Tui é a prolongación e renovación da plataforma para mellorar a accesibilidade dos viaxeiros. Tamén se creará unha nova plataforma lateral alén das vías e para a comunicación entre eles realizarase un paso inferior, incluíndo un percorrido libre de obstáculos con alternativa sen chanzos.

Estes traballos serán realizados pola UTE integrada por Dragados e Tecsa Empresa Construtora. Con esta actuación, Adif destinou un total de 33,7 millóns de euros de investimento na mellora da conexión ferroviaria entre España e Portugal.