A Xunta incrementará ata os 14,3 millóns de euros, case 3 millóns máis do consignado inicialmente, o orzamento de licitación das obras para ampliar a urbanización do barrio de San Paio de Navia, en Vigo.

Segundo explicou o presidente galego, Alfonso Rueda, na rolda de prensa posterior á reunión semanal do seu Goberno, o obxectivo desta ampliación de crédito é adaptar as condicións do contrato “para facer fronte á subida de prezos e ao encarecemento dos materiais”.

En concreto, a ampliación do barrio de San Paio de Navia divídese en tres fases e permitirá habilitar un total de 1.600 vivendas protexidas, 733 delas proxectadas no polígono número 1. Neste contexto, Rueda lembrou que para poder adxudicar e iniciar a urbanización da primeira fase aínda é necesario que o Concello de Vigo “dea o visto e prace ao proxecto”.