Os donos da discoteca Villa Rosa de Baiona, un empresario e o seu fillo, sentarán este mércores no banco dos acusados do xulgado do Penal 3 de Vigo, tras tres adiamentos do xuízo por diversas razóns, acusados dun delito contra o medio ambiente e un de lesións, polos ruídos que xeraba o local, e enfróntanse a 4 anos de cárcere e multa de 84.000 euros.

A vista sinalouse inicialmente para abril de 2021, pero foi suspendida porque unha das partes non recibira toda a documentación do procedemento, e fixouse para outubro dese ano. Nese momento, tamén se suspendeu pola personación dun novo letrado e fixouse unha nova data, para febreiro de 2022.

Con todo, en febreiro, e tras negociacións infrutuosas para chegar a un acordo, a vista acabou por aprazarse novamente xa que, a falta de conformidade, non podía celebrarse o xuízo pola ausencia de varias testemuñas. Por iso, foi fixado para este mércores.

ACUSACIÓN PÚBLICA

Segundo o escrito de acusación da Fiscalía, “polo menos desde 2014” esta discoteca xeraba ruídos que excedían os límites legais e, a pesar das numerosas denuncias, mantivo a súa actividade. Así, as medicións realizadas entre 2014 e 2017 no exterior do local arroxaron resultados de máis de 70 decibeis (cando o máximo permitido eran 50) e as realizadas na vivenda dos denunciantes superaron con fartura os 40 decibeis (cando o máximo eran 30).

O local foi denunciado e o Concello de Baiona ordenou a suspensión da actividade e incoou expediente sancionador en 2015 polos ruídos, e tamén pola realización de certas obras sen licenza. Pero os avisos non deron resultado e, de feito, o propio consistorio foi instado polos tribunais a executar esa suspensión de actividade. Aínda que se precintou a discoteca, posteriormente reabriu tras emendarse as deficiencias detectadas.

PREXUDICADOS

Un matrimonio que vivía preto do establecemento iniciou unha batalla legal polos ruídos que tiña que soportar e que lles levaron mesmo a trasladar as súas fillas menores a casa doutros familiares cada vez que abría pola noite o ‘Villa Rosa’.

Ao longo de catro anos (acabáronse cambiando de domicilio en 2018) tiveron que soportar niveis de contaminación acústica que lles impedían descansar e que orixinaron un trastorno adaptativo asociado a “unha situación vital estresante”, segundo a Fiscalía. Así, padeceron insomnio, ansiedade, trastornos somáticos, etc., e quedoulles como secuela un trastorno neurótico.

DELITOS E PENAS

Por estes feitos, o ministerio público acusa os procesados dun delito contra o medio ambiente e un delito de lesións, e pide para cada un deles 4 anos de prisión e o pago dunha multa de 84.000 euros.

Ademais, pide que indemnicen a cada un dos prexudicados en 39.000 euros e lles paguen os gastos médicos nos que incorreron neses catro anos. Tamén solicita 4 anos de inhabilitación para exercer profesión no ámbito da hostalaría.

Por outra banda, para a sociedade creada por pai e fillo, e dona do local, a Fiscalía pide o abono dunha multa de 360.000 euros e o peche definitivo.