O alcalde de Vigo, Abel Caballero, confirmou este martes a adxudicación do proxecto para construír a conexión peonil entre Serafín Avendaño e Vía Norte, que inclúe a instalación dunha gran torre con dous ascensores e unha pasarela circular que sobrevoará a autoestrada AP-9, coñecido como o proxecto ‘Halo’, por un importe de 12,56 millóns de euros.

Segundo informou en rolda de prensa o rexedor olívico, o proxecto, adxudicado este martes nunha sesión extraordinaria da Xunta de Goberno, inclúe unha serie de melloras no cerramento de vidro, a carpintaría ou a integración paisaxística. Así mesmo, subliñou, dos 12,56 millóns do custo da obra, “o goberno de España, Pedro Sánchez, paga case a metade (case 6 millóns de euros)”, coa asignación de fondos da UE.

O rexedor mostrou a súa satisfacción pola adxudicación deste proxecto e sinalou que, nuns 15 días, formalizarase o contrato, que poderá ser asinado no mes de xullo, de maneira que os traballos de construción poderán empezar en agosto. “Imos a uña de cabalo, en tempo e forma, nunha das grandes obras de Europa. O ascensor ‘Halo’ vai dar a volta ao mundo. É excepcional”, proclamou Caballero.