Este domingo, día 15 de maio, arrinca oficialmente a tempada alta no Parque Nacional marítimo-terrestre das Illas Atlánticas de Galicia, un período que se estenderá ata o próximo 15 de setembro e durante o cal será imprescindible contar cunha autorización da Xunta para poder viaxar aos arquipélagos de Cíes e de Ons.
A delegada territorial da Xunta en Vigo, Marta Fernández-Tapias, visitou este venres as Cíes, onde indicou que xa hai case 1.200 reservas confirmadas para as xornadas do 15, 16 e 17 de maio, coincidindo coa ponte das Letras Galegas.
Neste sentido, a responsable autonómica destacou o interese turístico crecente que esperta o arquipélago vigués entre os visitantes que acoden cada ano a Galicia, principalmente durante os meses de verán.
